Vir sommige is Ravensmead in die Kaap die gatkant van onse wêreld. Vir ander – soos die skrywer – hul
komvandaanplek, speelplek en droomplek. Jy moet hier gebore word om te verstaan hoe jou hart teen jou ribbes begin skop as jy op Vlaktegrond uitstap. Hier word baie gehuil, maar nog meer gelag – want waar mooi en onmooi half onverskillig deurmekaargeklits is, dáár gebeur die lewe.

Op sy kleinhoewe buite Johannesburg bewerk Abel Lotz die velle van diertjies om te verruil vir die maskers wat hy in sy galery verkoop. Vir sy 50ste verjaarsdag wil hy homself bederf met ’n nuwe gesig. Inspekteur Ella Neser se eerste moordsaak is ongewoon. Die liggaam van ‘n jong vrou is byna sagkens agtergelaat, afgesien van ’n vreemde skouerwond…

Uittreksel uit boek:

Hoofstuk 1

In die spieël, klaar geskeer, sy vel tintelend, betrag Abel sy gesig. Die haatlike gelaatstrekke, onvoltooide knoeiwerk van ’n lomp beeldhouer. Dan die beeltenis van ’n hand, die een wat die skeermes vashou, en soms die skalpel. En strelende oor die voorkop,
die wange en ken, oor die brug van die plat neus, ontsluit die aanraking van die vingers aan sy vel die gekoggel en verstoting.
Hy leun vooroor. Is dit ’n druppel water wat daar in die binnehoek van die lui oog uitglip? In die spieël dep die kussing van ’n voorvinger die druppel en bring dit na die punt van die tong.
Souterig. ’n Traan, dink hy gelate. Hy het grootgeword met versmading en wantroue in die wêreld, ’n traan is gepas.
Net sy moeder kon hy vertrou. Van kleintyd af het sy hom aangemoedig om sy troos in isolasie te gaan soek. En by haar. By haar is hy homself, by haar hoef hy hom nie in hoeke en skadu’s teen die aanblik van mense te verskans nie, hoef hy nie ’n masker van mee-lewing te probeer dra nie.
Nou ’n trekking aan die mondhoeke, net ’n grimas. Abel glimlag selde. Maar oor ’n maand is sy verjaardag. En hy gaan homself bederf met ’n besondere geskenk: ’n nuwe gesig.
Dit is nie ’n impulsiewe besluit nie, hy het lank daaroor getob.
Hy staan voor die spieël en voel hoe die opwinding diep in hom roer en opwel. Dit begin met ’n trilling in sy bene asof hy in ’n atmosfeer van gewigloosheid wil sweef.
En ’n aanvallige gesig. Vir ’n spesiale okkasie, ’n spesiale gemoedstemming, wil hy ’n mooi gesig voorsit.
Maar natuurlik, dink hy met ’n wispelturige knip van sy lui oog, sal hy eers sy moeder se mening gaan vra. Soos die gebruik in alle groot besluite, is háár seën nodig. Tog het hy geen sweem van twyfel nie. Sy moeder sal begryp, sy sal sy behoefte verstaan aan ’n
opwindende tussenspel met ’n nuwe gelaat.
Nie noodwendig die gesig van ’n man nie, verkieslik nié. Eerder die fyn gelaatstrekke van ’n jong vrou, peins hy voor die spieël. Die dogter waarna sy moeder so gesmag het.
Ja, dink Abel nou geesdriftig en effe duiselig, vir sy nuwe voorkoms wil hy die perfekte gelaat van ’n jong vrou hê, delikaat en nog onbedorwe; ’n teder vel van saggelooide maagdeperkament wanneer hy haar gesig oor syne aantrek.

Hoofstuk 2

Die vrou in byderwetse slenterdrag stap eers by die toonvenster verby, steek dan vas, soos winkelkykers doen as iets die oog vang. Op koers na die Gucci-boetiek, maar op ’n Saterdagoggend in ’n winkelsentrum is die bestemming net die hoogtepunt van ’n genotlike wandeltog. Slenter, drink koffie, blaai deur ’n nuwe boek, luister na ’n CD-snit, pas ’n deftige sonbril op, koop kaas en olywe vir die aand se gaste, miskien ’n vrylopende hoender, nou bevrore, vir Sondagmiddag se ete, voel aan jou palm die tekstuur van ’n handgeweefde tapyt uit Turkmenistan. Op pad na die Gucci-bloes en Zanotti-sandale is jy deel van die promenade. En as ’n bonte samekoms van makabere gesigte agter ’n toonvenster jou aandag trek, steek jy vas, al is dit net uit nuuskierigheid.
Sy ken etniese Afrikamaskers; tiekie-’n-bos in die padstalletjies van snuisternysmouse, saam met beeldjies uit seepsteen, Afrikadiere uit hout, bric-à-brac van leer, erdewerk en kleurryke kraletjies. Sy steek vas, hierdie is nie net nog n kuriowinkel nie, nie ingeprop met rakke vol nuttelose soeweniers nie, eerder ’n antikwariese galery. En dit is wat haar interesseer, dit is haar veld: oudhede. Sy stap in.

Die Italianer Antonio beland as krygsgevangene op ‘n
Bosveldplaas waar hy klipwerk doen. Hier ontmoet hy vir Klara, die Afrikaner-meisie wat sy geesgenoot
word…

Hierdie jaarbeplanner bevat spitsvondige aanhalings van
bekendes, van Audrey Blignault tot André P Brink, van
Marita van der Vyver tot Mathews Phosa, en Nataniël tot
Nelson Mandela.
• Aanhalings van SA skrywers, denkers,
leiers en kunstenaars
• Vars, moderne uitleg
• Verfrissende inhoud
• Formaat wat elke handsak sal pas

’n Eensame man wat vasgevang is in ’n verlede wat hy nie kan onthou nie, wil as ’n vrywilliger deur genadedood sterf. Hy verlaat sy solderkamer, loop verby die deur van sy buurvrou, die prostituut, en stap die stad in, op pad na die kliniek. Dan besluit hy om vir oulaas die biblioteek te besoek … en hy word
onverwags meegesleur na ’n byeenkoms met gemaskerde feesgangers. ’n Sielkundige riller waarin die mens se
diepste onderbewuste verken word.

Die verhaal van 2 broers – skilder Aaron en eks-verslaafde Stefaans. Aaron se galery-eienaar laat
hom in die steek en Bubbles Bothma, vriendin extraordinaire, gee raad!

Skielik op ’n dag is alles anders. Waarskuwings dui
daarop dat die wêreld nie meer ons woning is nie en
mense begin dinge doen wat hulle nooit voorheen
sou nie. Gewelddadige dinge ... alles is onvoorspelbaar. Onbekend. ’n Man en vrou stry om sin te maak van wat om hulle gebeur. Hulle moet waak teen gevare wat om elke hoek kan skuil ... en dán? As jou bestaan ’n nagmerrie word, wie vertrou jy?
• ‘n Storie van die newelwêreld tussen sielkundige
riller en ware gruverhaal.

Clara Brand skreeu om wraak. Haar man Bernard het haar en hul drie kinders vir een van haar vriendinne gelos. Sy stort haar woede, haar behoefte aan begrip en ondersteuning uit in briewe. Die briewe wys die verskeie ‘stasies’ van Clara se herstelproses: woede,
aanvaarding, nuwe vryheid, herstel van haar sekslewe, hernieude bande met haar eks-man, die deurlopende poging om haar kinders normaal groot te maak. ’n Vreeslose, soms skreeusnaakse ontboeseming.
Dit skitter én ontplof, skok én verkwik, soos net die vurigste verhoudings kan.

Zoë ontmoet Donatello, ‘n advokaat wat sy klerekas colour code en suiwer Afrikaans praat op www.matchmate.
Wanneer hulle uiteindelik in lewende lyf ontmoet, is die gevolge skreeusnaaks.

Hierdie nuwe bundel bevat 3 kort romans en 19 kortverhale – ‘n heerlike dik omnibus vir aanhangers om aan te smul. Botes se bekende stem sal jou meesleur, vermaak en met diep menslike insigte oor dinge laat dink. Sluit ‘n essay in waarin sy die
genesis van haar skrywerskap beskryf.

Met bewondering, deernis en ’n skerp sin vir humor skets die skrywer die kontreigeskiedenis van die Vrystaat en sy mense. Geniet stories oor alles van stoethoenders en begrafnisse tot reise met kinders en koeldrank. Boeiend en by tye skreeusnaaks.

Emma tel ‘n siek baba in ’n boks langs die N1 op en besluit om die kind te hou. Sy was nog nie oor die skok van ’n huwelik wat voor die kansel geëindig het nie. Toe Gert, die man op wie sy so versot was, van die aanneming hoor, verskyn hy weer en belowe om ’n pa vir Nella te wees. Niks meer as dit nie, want Emma se
pa het dit daardie dag in die kerk verbied. Vir 12 jaar lank loop alles goed – tot die oggend toe Emma ontdek Nella is met tik deurmekaar ... en die ondenkbare word denkbaar.

Nuwe horison: Hendrien Hugo word uit haar rykmeisielewe geruk deur haar aangetrokkenheid
tot die aantreklike dr Luther Lubbe.
• Bloeisels in die ryp: Skrander kinderhuiskind Renske Conradie se droom van ’n universiteitsgraad spat aan skerwe toe sy swanger raak.
• Zuleka Bordeaux: Die hoofkarakter se boot word deur ’n seerower gebuit en sy leer in die proses vir die eerste keer die krag van haar eie emosies ken.

Drie verhale deur die immer-gewilde Ena Murray: Agter die masker, Bruid uit die vreemde en Haar grootste offer.

Karel Fechter, parkhoof van Etosha, weet hy staan in die pad van die nuwe regering se ontwikkelingsplanne.
Op ’n dag probeer Fechter se teenwilddiefstaleenheid
‘n wildstroper – die hoofman van ‘n Himba-stam en Justus Tjambiro se pa – vang. Die renosterhoring wat die stroper laat val terwyl hy vlug, moes betaal vir sy
seun se universiteitsopleiding. Wanneer Justus sy pa
se lyk vind, neem hy hom voor om hom te wreek op
Fechter. Só word Etosha die brandpunt van botsings
wat uit die transformasie van natuurbewaring
spruit.

• Iewers wag die môre: Kan Fiona en Johan se
huwelik gered word?
• Mariëtte aan ’n lyntjie: Hoe het lugwaardin
Mariëtte in dié gemors beland?
• Ouverture op Overberg: Kobie moet kies tussen erf en trou?

Clara Brand is seething. Her husband has left her for one of her friends, a journalist at a magazine where Clara works. Anaïs – 10 years younger, thin, beautiful and incapable of even boiling an egg. But revenge is a dish best served cold...

Dié 5 stories skets wêrelde waar hardebaarde kan liefhê, helde nog met die vuis kan slaan en mense met hul verlede gekonfronteer word.

’n Verhaal oor die vriendskap tussen twee seuns uit verskillende kulture. ‘n Moet-lees vir alle natuur- en
buiteleweliefhebbers, propvol avontuur en lesse in menseverhoudinge! Wonderlike gebruik van Boesman-
Afrikaans.

Dié boek neem jou terug na die Vrystaat en Transvaal van net ná die Groot Trek tot in die 1940’s. Dis die
wêreld van wilde boere, transportryery, jag, oorlogservarings, liegstories en spookstories.

Maud se “regte” lewe ontvou in die sporadiese ontmoetings tussen haar en voormalige presidentsvrou
Marike de Klerk.

Dié boek sleep jou deur die ekstase maar ook die verskriklike tuimelings van die rockwêreld. Tog is daar is dinge wat nie deur dwelms, seks, ure se oefening in ’n gimnasium of die bewondering van derduisende aanhangers verdryf kan word nie...

Drie vriendinne hou vakansie langs die see – net om agter te kom elkeen van hulle bewaar al jare lank ‘n
geheim wat die ander nie dúrf weet nie …

• Bruid van die woestyn: Colette se ksip word voor die Kaap deur seerowers oorval.
• Woestynwind oor Jawarah: Die slavin Ara moet deur die woestyn na vryheid reis.
• Hart van die Groot Woestyn: Caroline moet 'n vloek verbreek deur 'n swaard op te spoor.

• Liewe Onskuld: Die jong rabbedoe Olivia Joubert lyk
aanvanklik na ’n onwaarskynlike kinderoppaster, maar sy
laat geen teenspraak toe nie en sy vat nie nee vir ‘n antwoord nie.
• Om lief te hê: Hester Verster aanvaar ’n pos by ’n plaasskool, maar die plaaseienaar is uit die staanspoor openlik vyandig teenoor haar.
• ‘n Veilige hawe: Madeleine trou met die doodgoeie
Johan, al maak sy dit duidelik dat sy nie verlief is op
hom nie.

• Skaduwees van gister: Matrone Anmar Cloete se pos word feitlik oornag oorbodig gemaak – en boonop word ’n nuwe dokter, haar gewese verloofde Clive, aangestel . . .
• Die geleende bruid: Charmain loop haar verdwene man, Arnold, weer raak, maar hy ken haar glad nie meer nie!
• Bruid van die Heerengracht: Daar verskyn aan die Kaap twee here wat albei beweer hulle is die enigste erfgenaam van die skatryk graaf De Brecy.

• ’n Les vir Elizabeth: Elizabeth moet tussen twee mans kies vir wie sy albei ewe lief is.
• Hoë berge: Die liefde blom tussen Ilze en Julius, maar albei worstel met ‘n verlede.
• Die onwillige bruid: Ruben raak hy verlief op ’n getroude vrou…

• Agter toe vensters: Erika se verhouding met Nico word
gekompliseer deur haar skandalige familie.
• Die wakende droom: Nelia verloor haar moeder in ’n
ongeluk, en sy voel aanspreeklik vir die verlies.
• Die gras sal weer groei: Wilma ontmoet ’n aantreklike
dokter, en sy begin wonder oor haar en Chris se
huweliksplanne . . .
• Dwaallig vir sterre: Frans moet kies tussen twee vroue – ’n rykmansdogter en ’n meisie met ’n geheime
verlede.

Die aangrypende verhaal van ‘n vrou wat probeer deurdring tot haar stiefseun wat aan skisofrenie ly. Haar konfrontasie met die skimme in sy kop bring meer vrae as antwoorde. Dan verloor hy beheer en dobber al verder weg terwyl sy ouers magteloos toekyk.

16 puik stories oor alles van die gryse voorstedelikheid van Parow en dooie siele wat met
mekaar praat tot by plante wat nes woorde en musiek al balsem vir ons droewige bestaan is.

Ná sy aangeval is, vlug Olivia na Oudtshoorn, waar sy
haar ouma en ’n vergete wêreld van swier en rykdom – die tyd van die pluimprinse – leer ken. Stadig begin
haar heling.

Jessie Jansen is modelmooi maar sit sonder selfbeeld
omdat haar man met ‘n jonger dolla vort is. Sjokolade is al wat troos. Dan sien ‘n talentsoeker vir Jessie
raak en sy begin ‘n nuwe lewe.

Rouke Bruwer, sy vriende en die vroue in hul lewe is pas uit matriek en Afrika wag. Die lewe is tegelyk mooi en seer. ’n Verhaal oor die kompleksiteit van die
liefde.

Alex Cloete is kwaad vir die lewe. Hy het nie geld nie, nie rigting nie, en sy geliefde seun, Zander, woon by sy ma, Mercia, ver van hom af. Wanneer Mercia in baie verdagte omstandighede sterf en die kind wegraak, kry Alex lewe en rigting. Alex glo dis sy geheime lewe toe hy in die weermag was, wat hom inhaal en die rede is vir hierdie ontvoering. Of is dit? Want sy ma blyk ook ʼn paar geheime te hê wat vir hiervoor verantwoordelik kan wees ... ʼn Naelbyter van internasionale standaard.

Met ‘n ma wat drink en ‘n pa wat al in die tronk was, het Claudie se lewe nie goed begin nie. Maar dis haar pa se skuld dat sy haar matriekjaar in die Salvation
Army moes deurbring...

In die vissersdorpie Toring langs die Weskus probeer wit en bruin oorleef. Dan vernietig ‘n verwoestende storm alles en almal moet ‘n nuwe begin maak. ‘n Verhaal van diep menslikheid.

‘n Kykie op die lewe van Boesmans. Vind uit waarom
Boesmans nie aan vreemdelinge wys waar water in die
woestyn is nie, en meer.

’n Posbode van die Weskus is in die moeilikheid. Die karakters staan magteloos voor kerkleiers, die regstelsel en ’n gemeenskap wat hulpeloses soms in
die steek laat…

Henno Barnard bly op ‘n rivierboot in Botswana en maak insetsels vir ‘n SA TV-program wat skielik eindig. Skielik moet hy ander bronne van inkomste vind. Die bestuurder van ‘n TV-produksiehuis, die beeldskone en gevaarlike Kim Naude, wil hom as haar kameraman oplei. Terselfdertyd vra gastehuisbestuurder Selma hom om haar met ‘n rolprent te help. Dan word verskeie moorde in die omgewing gepleeg en Henno besef almal is nie wie hulle sê hulle is nie.